C O N F L I C T

Internal Conflict

Namaskaar,

Writing Witing ke sabse pehle article mein aapka swaagat hai. 

Aur is article mein hum samajhne ki koshish karenge CONFLICT ko, 

jo ki kisi bhi kahaani ko mazedaar ya boring banata hai.

"Toh aakhir Conflict hota kya ?"

Definition ke hisaab se,

"Conflict is a state of opposition 

between persons or ideas or interests."

Toh ye toh ho gayi Dictionary waali definition. 

Lekin Conflict aakhir hota kya hai? 

Aur ise storytelling mein kis tarah istemaal kiya jaata hai?

Aaiye samajhte hain.

AAKHIR CONFLICT HOTA KYA HAI?

Maan lijiye aap jaldbaazi mein ghar se baahar nikalte hain. Aapko bina samay ganwaaye kahin pahunchna hai. Lekin jaise hi aap sadak par aate hain, aap dekhte hain ki aapke saamne mohalle ka khoonkhaar aur katkhana kutta khadaa hai. Aur wo aap hi ki aankhon mein jhaank raha hai. Aap samajh jaate hain ki aaj is kutte se lade bina nikalna mushkil hai.

Aap uske andar ki haivaaniyat dekh aur mehsoos kar paa rahe hain. Aapki manzil tak jaane ka raasta kewal wo sadak hai, aur us sadak par wo kutta khadaa aapka raasta roke hue hai. Is kutte ke chakkar mein khoya hua har ek minute aur second aapke kaam ko aur bigaad raha hai.

Kucch mehsoos hua?
Isi ko conflict kehte hain.

Conflict kisi kahaani ko aage badhaane 

aur interesting banaane mein madad karta hai.

Kisi story mein Conflict wo tension ya virodhabhaas hota hai 

jo story ke main character ya kahaani ko aage badhne se rokta hai. 

Ise hum Hindi mein dwand ya ladaai bhi keh sakte hain. Aur isi conflict ko dhobi-pacchaad dekar hamara Main Character story ko aage badhata hai, aur Hero ban'ne ka medal leta hai.

Yaad rakhiye, conflict jitna strong hoga,

aapka character utna hi strong banega.

Isiliye koi bhi kahaani likhte wakt hamein sabse pehle 

apne aap se ye sawaal poocchna chahiye - 

“Is kahaani mein sabse badaa conflict kya hai?”

Toh chaliye acche conflicts ke kucch examples dekhte hain.

CONFLICT KE EXAMPLES

Mere khayaal se prastut films aur TV shows lagbhag sabhi ne dekh rakhe honge. Agar nahi dekhe, toh dekh lein, ye sab internet par ublabdh hain. 

PATAL LOK
Created by: Sudip Sharma

Amazon Prime ki is web series mein iske main character
Inspector Hathiram Chaudhary (Jaideep Ahlawat) ka asli dwand (conflict) usi ke department ke saath hai. Hathiram bharsak koshish karta hai ki wo apne pehle bade case ko acche se investigate kare, lekin usi ke department ke log jaan-boojhkar ya anjaane mein uski investigation ki raah mein rukaawat khadi karte rehte hain.

ANDHADHUN
Directed by: Sriram Raghavan

Is film mein Main character Akash (Ayushman Khurana) sabke saamne andhaa hone ki acting karta hai. Lekin jab wo apni aankhon ke saamne ek katl dekhta hai, toh wo is kashmakash mein phans jaata hai ki apne aapko bachaane ke liye andhe hone ka naatak zaari rakhe ya police ko sab sach bataa de.

3 IDIOTS

Directed by: Rajkumar Hirani

Is film mein adhiktar characters aur unke conflicts aapas mein jude hue hain. Kahaani ke Main Character Rancchod Das (Amir Khan) ka conflict ye hai ki wo sirf padhne mein interested hai, number game mein nahi. Lekin College ka top student bankar wo usi race ka sabse bada player ban jaata hai. Aur iski wajah se uske dushmano ke saath uske dost bhi us se chidne lagte hain.

Toh in examples ki tarah hi aap agar aur bhi films aur TV shows ko dekh kar samajhne ki koshish karenge toh paayenge ki har acchi story ke peecche ek accha conflict hoga. Jis bhi story mein accha conflict nahi hota hai, wo story bikhar jaati hai.

CONFLICT KITNE TARAH KA HOTA HAI?

Jaisa ki hamne ab tak samjha hai, Conflict kisi character ki ladaai hoti hai, kisi doosre character ya situation ke khilaaf. Lekin kabhi kabhi ye ladaai apne aap se bhi hoti hai. Isiliye ye ladaaiyaan (conflict) baahri ya bheetri kisi bhi tarah ki ho sakti hain. Isi tarz par hum Conflict ko mukhya taur par do prakaar ka hota hai -

INTERNAL CONFLICT (Andarooni Ladaai):

Ye conflict Character ke man ke andar chal raha hota hai. Is conflict mein Character apne hi vichaaro aur bhaawnaao se lad raha hota hai. Ye conflict zyadaatar acchai aur buraai ke formula ke saath use kiya jaata hai, jismein Character kucch galat kar raha hai, lekin uski antaraatma use sahi kaam karne ke liye dhikkarti rehti hai. Ya phir wo kucch accha kar raha hai lekin us se use koi fayda nahi ho raha (ulte nuksaan ho raha hai) aur tab Character ke man mein acchai ka raasta cchodne ka khayaal aata hai. Ye conflict ek hi character ke andar chal rahe Saiddhantik Matbhed se paida hota hai.

EXTERNAL CONFLICT (Baahri Ladaai):

Ye conflict Character ke baahar ki kisi taakat ke khilaaf hota hai. Is conflict mein Character kisi bhi aisi taakat (chaahe wo koi doosra character ho ya samaaj) se ladtaa hai jo uske bus mein nahi hai. Adhiktar kahaaniyon mein External Conflict zyada dekhne ko milta hai.

CONFLICT KIN HAALATO MEIN HOTA HAI?

Ab dono mukhya Conflicts ko samajhne ke baad 

hum conflicts ki situations samajhne ki koshish karte hain. 

Ye wo haalat hote hain, jinke andar conflict paida hota hai. Isiliye ye bhi ek tarah se Conflict ke types hi maane jaa sakte hain.

#1 - CHARACTER VS SELF (Khud se Ladaai):

Ye Internal Conflict hai jismein koi Cahracter apne aap se hi lad raha hota hai.

Example: Andhadhun ka Akash, sabko apne batana chahta hai ki wo andhaa nahi hai. Lekin uska andhaapan uske liye kaafi faaydemand saabit ho raha hai. Kahaani ke beech mein uske andar ek dwand uthta hai ki wo apni sachchaai doosro ko bataaye ya nahi.

#2 - CHARACTER VS CHARACTER (Doosre se Ladaai)

Ye sabse common Conflict hai, jismein koi ek Character, doosre Character se bhidta hai. Kyuki shaayad in dono Characters ko ek hi cheez haasil karni hai. Is se ye dono characters aamne saamne aa jaate hain aur audience isi ka andaaza lagaati reh jaati hai ki jeet kiski hogi.  

Example: Munnabhai MBBS mein Munna (Sanjay Dutt) ki seedhi ladaai Medical College ke Dean (Boman Irani) se hai. Munna chahta hai ki wo bina padhe Doctor ki degree le le, lekin Dean aisa hone nahi dena chahta.

#3 - CHARACTER VS SOCIETY (Samaaj se Ladaai):

Is Conflict mein Main Character kisi ek Character se nahi, balki bahut saare Characters se ek saath lad raha hota hai. Ye ladaai samaaj ke khilaaf hoti hai, yaani ki ek vichaardhaara ke khilaaf. Rajkumar Hirani ki sabhi filmein is Conflict ka example hain. Jinmein Main character poore samaaj se lad raha hota hai.

Example: Rajkumar Hirani ki PK is conflict ka ek accha example hai jismein Main Character PK (Amir Khan) anew Dharm Guruon ke roop mein samaaj se lad raha hai. 

#4 - CHARACTER VS NON HUMAN (ANJAAN SE LADAAI):

Ab ye ek alag tarah ka Conflict hai. Ismein Character apne aap se, ya kisi aur character, ya samaaj se nahi lad raha hota, balki ek aisi shakti ke khilaaf lad raha hota hai jo sabhi ke kaabu se baahar ho chuki hoti hai. Ye shakti bhoot pret, aliens ya koi benaami taakat ho sakti hai jo insaan nahi hai. Aisa conflict hamein horror films ya sci-fi (science fiction) aur fantasy films mein dekhne ko milta hai. 

Example: Film Stree mein Vicky (Rajkumar Rao) aur uske dost ek aisi shakti ke khilaaf lad rahe hain jo insaan nahi hai. Lekin inka conflict utna hi asli hai jitna ki kisi insaan ke khilaaf hota. Lekin isi film ka conflict Society ke khilaaf bhi maana jaa sakta hai.

CONFLICT PAIDA KAISE HOTA HAI?

Ek zaruri sawaal ye bhi hai ki kisi kahaani mein Conflict aata kahaan se hai? Aakhir aisi kya cheez hai jo conflict paida karne ke liye zaruri hai?

Iska jawaab hai - Desire.

Gautam Buddha ne kahaa hai - 

"Iccha sansaar ke sabhi dukho ka kaaran hai."

Bus isi Iccha ko writing mein Desire kahaa gaya hai, 

aur Dukh ek tarah se Conflict samajh lijiye. 

Is tarah Desire hi Conflict ka kaaran banti hai. Writing ki bhasha mein iska wahi arth hai jo saadhaaran taur par hota hai. Lekin phir bhi main is shabd ka arth jaldi se samjhaane ki koshish karta hu.

Desire: Aapke Character ko kis cheez ki iccha hai ? Jis bhi cheez ko paane ke liye aapka Character zameen aasmaan ek kar deta hai (itni mehnat na kare toh bhi chalega) wo us Character ki Desire kehlaati hai. Ye kaafi baahri level par kaam karti hai. Aur iski badi behen ‘Need’ andarooni level par kaam karti hai. (Desire aur Need ko detail mein ek doosre article mein samjhenge).

Toh 100 baat ki ek baat; 

Character ko jo chahiye hota hai, 

wahi uski desire hoti hai. 

Aur isi Desire se kahaani mein Conflict paida hota hai. 

Chaliye ek example dekhte hain;

Maan lijiye ek Character hai jise hum A bulaayenge. 

Ab A ko chahiye ek NAUKRI. Toh, 

Naukri = A ki Desire

A naukri lene ke liye ek interview dene jaata hai. Lekin wo dekhta hai ki wahaan interview lene waala koi aisa aadmi hai jiske saath A pehle badsulooki kar chuka hai. Ab A jaanta hai ki use ye Naukri aasaani 

se nahi milne waali.

Conflict !

Isi tarah jab bhi aab koi kahaani likhein, ya Character sochein, sabse pehle aapko uske Conflict ke baare mein sochna chahiye. Conflict jitna simple aur saral hoga, utna hi audience ko mazbooti se apne andar kheenchega. 

Toh yaad rakhiye, kisi bhi acchi kahaani ke liye sabse zaruri hota hai ek Accha Conflict. Kyuki, ek acche Conflict se paida hota hai badhiya Drama!

Toh is article ke liye itna hi kaafi hai.

Aur agar aapko ye article accha lagaa 
toh please Writing-Viting ko support karein.

Main aapke liye agla article aur ek podcast 
taiyaar karne mein lagaa hua hu.

Aur tab tak, 

Likho, Khoob Likho, Likhte Raho !